अबैधानिक समिति गठन, मुस्लिम समुदायद्वारा बिरोध

नेपालगन्ज ८ माघः बाँकेको नेपालगन्जमा रहेको दारुल उलुम फैजुन्नवी जामा मस्जिद ईदगाह सञ्चालक समितिको आन्तरिक विवाद जिल्ला प्रशासन कार्यालय बाँके हुदैँ गृह मन्त्रालय सम्म पुगेको छ ।
आठ वर्षदेखि लेखापरीक्षण र नविकरण नगरी करोडौँ रकम अपचलन गरेको र विगत ७ महिनादेखि निर्वाचन गराउने भनेर जिल्ला प्रशासन कार्यलयले गठन गरेको तदर्थ समितिले समेत साधारण सभा गराउन नसके पछि तदर्थ समितिले नै निर्वाचन गराउन भनी ५ सदस्य निर्वाचन समिति गठन गरेको थियो । तर, उक्त समितिले समेत निर्वाचन प्रक्रियामा नगएर तेस्रो साधारण सभा गरेर १९२७ जना सदस्य रहेको जामा मस्जिदमा एक सय ५१ जनाको उपस्थिती गराई अबैधानिक तरिकाले मूल समिति नै गठन गरेपछि साधारण सदस्यहरु निर्वाचनको माग गर्दै सोमबार प्रमुख जिल्ला अधिकारीलाई ज्ञापन बुझाएका छन् ।
ज्ञापन पत्र बुझाउँदै साधारण सदस्यहरुले निर्वाचन गराउने भनी गठन भएको निर्वाचन समितिका संयोजक सलिम हल्वाई (बाबु नेता) ले आफ्नो घरमा बसेर मूल समिति गठन गर्दै आफै मूल समितिको कोषाध्यक्ष बनेपछि संयोजक हल्वाईको कर्तुत सार्वजानिक भएको बताए ।
प्रमुख जिल्ला अधिकारी खगेन्द्र प्रसाद रिजाललाई ज्ञापन पत्र बुझाउँदै मुस्लिमहरुले २४ घण्टा भित्रै अबैधानिक रुपमा गठन भएको समितिलाई खारेज गरेर निर्वाचन घोषणा नगरिए चरणबद्ध आन्दोलन गर्न बाध्य हुने चेतावनी दिएका छन् ।
प्रजिअ रिजालले ज्ञापन पत्र बुझ्दै मुस्लिमहरुले उठाएको मागप्रति आफू गम्भीर रहेको बताउँदै उनले जामा मस्जिदको विवादका विषयमा छानविन शुरु गरिएको बताए । उनले ८ वर्षसम्म संस्था नविकरण र लेखापरीक्षण समेत नगरी पश्चिम नेपालको सबै भन्दा ठूलो धार्मिक संस्थामा कसरी आर्थिक कारोबार हुन सक्यो ? कस–कसले कुन परियोजनका लागि उक्त संस्थामा पैसा दिए लगायतका विषयमा छानविन शुरु गरिएको बताउँदै उनले संस्था नविकरण नभएसम्म कुनै व्यक्तिले गठन गरेको समितिलाई बैधानिकता दिन नमिल्ने जिकिर गर्नु भयो । प्रजिअ रिजालले समाज भित्रै द्वन्द्व गराउन मनोपरी तरिकाले समिति गठन गरेको प्रमाणित भए निर्वाचन समितिलाई हदैसम्म कारबाही गर्ने बताए ।
पश्चिम नेपालकै मुस्लिम समुदायको धार्मिक स्थल दारुल उलुम फैजुन्नबी जामा मस्जिदलाई ८ वर्ष देखि लेखापरीक्षण र नविकरण नगरि मनोपरी तरिकाले अनैतिक तत्वहरुले सञ्चालन गर्दै करोडौ रकम हिनामिना गरिएको भन्दै मस्जिदका निर्वतमान महासचिव इरफान सिद्धिकिले जिल्ला प्रशासन कार्यालयमा उजुरी दिएपछि उक्त तथ्य सार्वजानिक भएको हो ।

Advertisement

नेपाल सरकारले दारुल उलुम फैजुन्नबी जामा मस्जिदको लेखा परीक्षण र निगरानी नहुनाले पनि यस्ता धन्दाको बढोत्तरी हुँदै गएको मुस्लिमहरुले आरोप लगाएका छन् । धार्मिक संस्थाको दानापानीमा ज्यान पाल्ने र तिनको गलत कामको पनि खुलेर समर्थन गर्नेहरु नै अबैधानिक रुपमा सो संस्थाको सञ्चालक समिति बनाएको खबरले मुस्लिमहरुलाई आक्रोशित बनाएको छ ।
कानूनको ब्याख्या गर्दै सधै द्वन्द्व, निराशा पैदा गर्ने मुस्लिम समूदायको तर्फबाट सदभाव समितिका संयोजक बनेका व्यक्तिले नै द्वन्द्व गराउन खोजेको भन्दै मुस्लिमहरुले त्यस्ता व्यक्तिलाई सद्भाव समितिबाट तत्काल हटाउन प्रजिअसंग माग गर्दै समूदाय भित्र द्वन्द्व गराउनेहरुको पहिचान गरी अबिलम्ब कारवाही गर्न माग गरेका छन् ।

धार्मिक संस्थाको दानापानीमा बाँच्न रमाइलो मान्ने र समुदायमा गद्दार गर्ने यस्ता परजीवी सोँचाइको जो–कोहीलाई पनि कडा निगरानीमा राख्न माग गर्दै मुस्लिम अगुवा किस्मत अलिले भने, धार्मिक संस्था चलाउन देशभक्तले ओतप्रोत भएको इमान्दार, कर्मठ सबैलाई मिलाएर स्थानीयसंगै हातेमालो गर्दै सामुहिक काम गर्न सक्ने असल नेतृत्वले मात्र नेपाली मुस्लिमलाई स्वाभिमानी र समृद्ध बनाउन सक्ने भएकोले तत्काल निर्वाचन गराई संस्थालाई जिवित गराउन प्रजिअसँग माग गरेका थिए ।

Advertisement

जिल्ला प्रशासन कार्यालय बाँकेले मुस्लिम समुदायको कुरालाई प्रमुख प्राथमिकतामा राख्दै सो संस्था भित्र भएको भ्रष्टाचारको छानविन गरि भ्रष्टाचारीहरुलाई कारबाही गर्ने र अबैधानिक समितिलाई खारेज गरि निर्वाचन गराउन छिट्टै पहल गर्ने छ भन्ने विश्वास लिएको पूर्व अध्यक्ष मोहम्मद हुसेनले बताए ।

मुस्लिमहरुले सोमबार नै नेपालगन्ज उपमहानगरपालिकाका मेयर प्रशान्त विष्टलाई समेत भेटेर ज्ञापन पत्र बुझाएका छन् । मेयर विष्टले निर्वाचन गराउन नगरपालिकाले पहल गर्ने बताउँदै मस्जिदलाई अनिर्णयको बन्दी बनाउन खोज्नु चिन्ताको विषय भएको भन्दै निर्वाचन गराउन आफूले पहल गर्ने प्रतिबद्धता व्यक्त गरेका थिए । मुस्लिमहरुले सोमबार नै गृह मन्त्रालय र मुस्लिम आयोगलाई समेत इमेल मार्फत ज्ञापन पत्र पठाएका छन् ।

Advertisement

भिडियो हेर्न लिन्क थिच्नुहोस् ⬇️

https://www.facebook.com/share/v/1DHoqqgqyX/?mibextid=wwXIfr